玄舍文史藝術部落

 

        <1582年葡萄牙船船難佮Formosa 平埔族相拄>   (擬繪本文本)

 

【詩讚Formosa美麗島】

 

        清風，微微仔吹

 

幾世紀進前

 

台灣的山

台灣的海

台灣的溪河

台灣的草埔

清風，微微仔吹

 

17世紀了後

 

荷蘭的船隊

駛過

明朝鄭成功的船隊

駛過

大清帝國的船隊

駛過

日本帝國的船隊

駛過

中國國民黨的船隊

駛來

 

啥時陣

清風，閣微微仔吹

 

吹過

台灣的山

台灣的海

台灣的溪河

台灣的草埔

 

1.【原史時代台灣南島語族】

 

    中央研究院院士曹永和先生佇1990年提出「臺灣島史觀」，認為對台灣史的研究會當跳出學界泛政治化的解說模式－－

「臺灣是一个獨立的歷史舞台，自史前時代開始，就有濟濟無仝種族、語言、文化的人群咧活動，𪜶所創造的歷史，都是這个島的歷史……以台灣島上『人民的歷史』做觀點去探討研究……。」

    台灣的歷史書寫受文字、政治佮漢文化的影響至深，現此時所看著的台灣歷史，會使講是漢文化人群佇台灣生湠的歷史。考古學家劉益昌教授認為，歷史書寫著愛思考以「土地」(塗跤底)為主的史觀，深化台灣人對家己所屬土地歷史文化的事實佮想像，來建構一部眞正的「台灣大歷史」。

    「Formosa」－台灣島嶼，佇東亞大陸海洋「花綵列島」中段－－北往東北亞，南到東南亞，是台灣海峽佮西太平洋海上的「十字路口」。是史前時期人類對東亞大陸「百越地區」遷徙來－－ 閣生湠到太平洋南美洲西岸「復活島」佮印度洋非洲東岸「馬達加斯加」的「南島民族」源頭。開闊的東亞海面，佇「冰河時期」是相通亞洲大陸的陸路，海平面上升了後是四通八達的「海路」。

    劉益昌教授講大約6000年前，南島語系先民陸續遷徙到台灣島嶼，5000年前有稻仔、小米種作；2300年前已經有台灣南島先民「貿易商」共花蓮「玉仔工廠」製造、加工的台灣特有種玉石，出口外銷也接受訂做到東南亞交易，換瑪瑙、玻璃所製造的琉璃珠佮青銅製品等等「舶來品」轉來台灣。

 

 

 

2.【大航海時代東亞海面】

 

    因為漢人、日本、朝鮮的海賊橫行古中國沿海，官方禁止民間貿易，予「琉球王國」自14世紀尾到16世紀向古中國進貢馬、硫磺等貢品進行「朝貢(官方)貿易」，對中國取得絲織品、瓷仔、鐵製品，往北到朝鮮、日本交易換蔘仔、日本刀劍、銀、黃金、銅，南到呂宋(菲律賓)，安南(越南)，佛太尼(泰國)，印尼－蘇門達臘北岸、東岸、爪哇北岸，滿刺加－麻六甲王國(馬來西亞)，換胡椒、香料、蘇木、錫、象牙、珠寶、酒， 閣佮阿拉伯、印度生理人交易，建立一个轉口貿易的東亞海上交通網。

16世紀開始，葡萄牙做先鋒的西方海上強權向東方發展，用武力強拍開通東亞的交易體系，東方大國的古中國成做歐洲佮亞洲「白銀」的會集地。古中國的「海禁」，予台灣海峽對面的台灣提供荷蘭、西班牙、明鄭政權佇東亞海上南來北往轉口佮走私的貿易，也就按呢「台灣」絞入去17世紀「全球化」的世界舞台，改變台灣此後風雲變色的命運。

 

 

3.【南島語系平埔族徛家過日】

 

    「Formosa」島上村社的查甫人，逐工主要的勞動是出外拍獵掠花鹿仔、野豬、羌仔、野雞，佇溪裡射魚，逐家轉到部落了後，獸肉「共食」分享－－老人、囡仔大細做伙食。庄內的工課是peh上樹仔頂遏椰子、檳榔；有時一家起厝，厝邊頭尾規村社來鬥跤手。當然，若佮別个村社發生衝突，著愛負責戰鬥。欲拍獵、起厝進前，會先「鳥卜」，聽鳥仔聲的大細聲來決定欲進行無。

    部落種稻仔、小米、芋仔、番薯佮織布、抾柴，是查某人的穡頭，定定是布巾圍咧偝囡仔那做穡，有時布巾結佇樹箍2爿做搖籃育幼嬰仔。

    退出勞動的老歲仔人，規工閒閒曲跤撚喙鬚，那噗薰那講古－－圍咧身軀邊的囡仔聽按怎掠花鹿仔、張野豬、射魚仔；特別是「出草」割人頭的勇士事蹟，聽甲喙開開耳仔覆覆。

 

 

 

4【南島語系平埔族出草風俗】

 

    一个村社有一个村社家己的律法規範，有人違反規定，經村社長老來裁決處罰。庄內的武力衝突是禁忌，若是引起無仝村社的大衝突－－大多數是為著侵犯拍獵「傳統領域」的問題－－會約好時間武鬥「出草」割人頭解決。先割著人頭的一爿表示戰贏隨走，袂致使發生大規模毀滅性的武裝戰爭；而且隔轉工就和解，恢復像平常時的往來。

    本意是覕咧草木內底等欲拍獵的「出草」，後來演變做戰鬥的行為－－「出草」割人頭的族人予眾人認定是部落的勇士，出草進前仝款會做「鳥卜」，看是吉是凶，決定欲出草無；眾人出發進前向祖靈稟告出草行程，祈求祖靈保佑。出草予人割去的人頭也受著尊重，村社有「祭首」佮招魂安靈敬天地的儀式。透過相關的儀式，也予村社 閣較仝心保護族人，共同抵抗外力入侵。

    南島語系的平埔族是「泛靈崇拜」，敬拜天地大自然的日月、山石、溪河、草木、動物的「靈」－－特別仝款是人類「人頭」的靈魂。

 

 

 

5【大航海時代西方海上強權入侵】

 

    16世紀西方工業起步，海上強權國家想欲開拓貿易佮探揣海外新資源，東方大國的「古中國」予當做是珍貴商品的主要貿易國，煞「海禁」致使東亞周邊的島嶼陷落強權國家的虎口。「Formosa－台灣」，當然也捲入去近代的強權搶奪體系，到17世紀初就予荷蘭軍事武裝集團入侵占領台南「古台江」地區。就按呢，台灣南島語系平埔族族對自主的村社生活型態，被逼轉做予殖民體制武力剝削的鹿仔皮轉口貿易區域，甚至時常拄著強權競爭發生國際「商戰」。到19世紀「清領時期」西方列強入侵，也強迫台灣開放港口對外通商，因為海上交通往來緊捷閣台灣沿海地形複雜多變，特別是南台灣的恆春半島海岸屬珊瑚礁(tsiau)暗礁地形，不時發生牢船的船難事件。

 

 

 

6【葡萄牙商船佇Formosa船難】

 

    台灣歷史上上有名的船難事件，是19世紀引起「牡丹社事件」改變台灣命運的「八瑤灣事件」；毋過，佇17世紀荷蘭入侵進前，應該早就船難不斷。

    1582年「葡萄牙商船船難事件」是西方人上早登陸臺灣的歷史紀錄－－

1582年7月初6，對澳門（葡萄牙語：Macau）有大細2隻船出發往日本，其中葡萄牙人船主Bartolomé Baez的中國式大帆船「戎克船」（Junk），載包括數百條金條佮講是「澳門所有的財富」的懸價貨物。船長是葡萄人Andres Feiyo，駛船的船工是中國漢人，船客有300人，有耶穌會欲去日本傳教的西班牙籍Pedro Gómez、Alonso Sánchez、Alvaro de Toro、Cristobal Moreira神父、葡萄牙籍Francisco Pírez修士，猶包括漢人、日本人、菲律賓原住民、非洲烏人奴隸。船出帆了後，一直透風，佇11日閣拄著風颱，漂流幾若工了後，7月16到一个離海岸大約20公里，完全袂認得所在風湧猶無平靜的外海。

 

 

 

7【生死未卜綴風湧漂流茫茫海岸】

 

    南島語系平埔族村社有起徛懸看有外力入侵無的「望高樓」，𪜶對「望高樓」遠遠看著又閣有牢船的船難發生－－

    佇風湧猶袂平靜的茫茫外海，為著驚反船，有人共掛帆布的船柱鋸斷，有的共行李擲去海裡減輕船的負擔。大船強欲散體，船頂的物件也四散漂流。船難者無船帆也無船桮，有坐比船內「舢舨(champana)」較細隻的船仔欲往海岸煞反船；船長Andres Feiyo佮4位神職人員坐舢舨仔差一點就沉落海。Cristobal Moreira神父共「San Úrsula・一萬一千聖女頭像」縛咧手股頭，坐幾个少年囡仔泅水佇四爿邊護牢的竹排仔，煞也反船跋落水幾若擺。後來船入水愈來愈厲害，猶佇船頂的船難者跳落海，有攬牢長枕頭、床枋，有扞散體的船枋、竹排仔浮浮沉沉飄向海岸。船難者想講可能是家己求生的目屎佮天主、聖母的慈悲看護，干焦1人不幸淹死；冒著大風湧的危險，甚至跋落海的，也相绁泅水予海湧沖上岸。

 

 

 

8【船難者上岸拄著Formosa原住民族】

 

    有的衫仔褲破破去、有的規身軀澹漉漉、甚至是褪腹裼無穿衫的狼狽相。船難者規陣人上岸無偌久，都猶袂回魂，煞對草刺埔走出大概20个赤身無穿衫干焦圍一塊腰布，頭毛鬖鬖，模樣像紅毛人佇印度Goa(果阿)看著的「野蠻人」，手提弓身揹箭一句話都無講，來抾船頂沖上岸所有白色的衫、幔巾、面巾，絲綢佮想欲挃的物件。無人知影𪜶是啥物人，會食人肉無， 閣船難者孤身予風湧沖上岸無紮武器毋敢反抗，雖然心內毋願，共金條、銀器藏好了後就隨在𪜶提；𪜶提了藏去樹林仔 閣來抾，敢若當做砂埔頂沐著海沙的物件是無人的，也親像無看著在場規船失魂落魄的船難者。

 

9【船難者向望求援轉失望】

 

    佇驚惶無望得時陣，規船的人除了留守以外，西班牙神父 Alonso Sanchéz神父佮Pedro Gómez神父𤆬領船難者分做2路欲深入陸地，想辦法透過在地「異教徒」(漢人？)住民拜見當地「國王」求援，才閣想看按怎脫身。後來半路想著原住民若有國王，語言袂通閣「野蠻人」的生活原始簡單，無才調救助𪜶規船的船難者。上尾攏放棄，轉到離海砂埔較遠，海水溢袂到的所在。船長指揮利用海水退流轉去破船提無流走的米、酒、肉佮其他的生活物資、武器，起會使暫時保命的草寮仔佮防守工事。

 

 

10【呂宋少年探訪平埔族村社】

 

    無欲請求援助了後，船難者想講佮Alonso Sánchez神父做陣的呂宋囡仔，佮紮弓箭武器來抾物件「野蠻人」的原住民有法度講話相通，就按呢予伊綴𪜶轉去村社。

    行欲倚村社，呂宋囡仔遠遠就看著竹仔林，行入庄內，有注意著行路的時陣，庄內的少年囡仔會背向長者讓路予長者過。路邊2爿是一間一間塗層疊懸5尺做台仔起的竹仔厝，厝頂崁一沿一沿尺半厚的茅草擋風擋雨。逐間厝有簡單的竹圍仔做牆隔開，竹圍仔內厝前厝後大空地仔有懸懸的椰子樹、檳榔樹、有青色、紅色果子仔的果子樹，有水井、架懸的粟倉。厝內外清清氣氣，門頂壁頂有掛鹿仔角佮豬頭殼、豬牙；厝內無隔間無桌仔椅仔，塗跤囥3、4粒大石頭，中央起火煮食物件，也做照明用；眠床是竹仔做的，抑是舒鹿仔皮睏塗跤。

    村社有一間特別大間的長草厝，3面壁正面無門的「公廨」，是族人服祀祖靈－「阿立祖」祈福求安佮專門的「神職」人員「尪姨」，負責祭拜、開禁「向」儀式、卜事、治病、辟邪消災的場所，也是族人聚會議事的所在。12~20歲未婚的少年囡仔不時集體蹛入去公廨，日時訓練拍獵、戰鬥、射箭、走鏢，暗時輪流顧暝保護部落。

    呂宋少年囡仔佇竹仔厝的人家接受款待，有食著米飯、豉的生鹿仔肉－ 閣有野豬肉、芋仔佮番薯。

 

 

 

11【船難者原住民衝突彈銃武鬥】

 

    隔轉工，呂宋囡仔佮70名輕武裝的村社原住民做伙轉到海邊，態度友善表示歡迎。轉去破船有提著武器，船難者內底有葡萄牙人展示火銃，現場彈穿過一支柴棍仔；原住民應該是頭一擺看著火銃的殺傷力，顯出真著驚的表情。了後，船難者就閣較敢自由自在四界行振動，來來回回去破船揣物件。8工了後，規隻船散體了了。

    雙方進前已經有一寡物件交換的交易、原住民猶是逐工來海砂埔想抾看有布料無。沖上岸穢垃圾幾若百塊的絲綢對船難者來講已經無路用矣，毋過船難者嘛是共阻擋想欲閣佮𪜶換小米抑白米。後來船難者聽講𪜶燒擲掉絲綢的火予原住民拍化去，共無燒掉的絲綢提去賣漢人。

    過無幾工，毋知按怎產生誤解，原住民無閣像對待朋友的態度來佮船難者和氣換物件，顛倒像敵人對𪜶警戒甚至發生攻擊。船難者予原住民射箭射死1个「卡菲爾」(Cafre－非洲烏人奴隸)人、2个漢人、3个人著箭受傷，船難者也用火銃彈死1个原住民。

 

 

 

12【南島語系平埔族葬禮】

 

    南島語系原住民族共「死亡」分做「自然死亡」(善死)佮「意外死亡」(惡死)；善死者是埋咧厝裡的「室內葬」，惡死者是袂當轉來厝裡的「室外葬」。

    予船難者彈死的遺體予族人偝轉村社，仝款按照村社禮俗，經過每一間人家就共遺體的喙灌酒，一直撫遺體的身軀表示永別。隔轉工，佇亡者的厝內，遺體的跤佮手縛牢咧囥佇塗跤的竹架仔頂，四周圍起火烘亡者的遺體。亡者的門口結綵，親友佇厝前挵鼓，村社的族人就紮酒來，亡者家屬攢豬肉做伙食。大食大啉了後，規陣查某人4、5對， 1个1个尻脊骿對尻脊骿跤手勻勻仔徙振動跳舞。親像電影慢動作，跳了忝就有人替換，差不多相绁跳2點鐘，表示對亡者的哀思佮尊敬。

    大概烘成10工，遺體烘焦了囥佇厝內底；厝若歹去欲重新起的時，才佇塗跤挖空，用直𫞼的姿勢共遺體埋入去，才佇面頂起厝。若無欲重起新厝，遺體就袂入土－－竹仔佮茅草起的厝大概堪得擋10年，終其尾遺體也著回歸塗跤底的大自然。

 

 

 

13【船難者遷徙退守溪邊造船】

 

    驚原住民閣來擾亂，閣干焦一窟無啥清氣的池仔水通用，也無安全的所在通造船，船難者才規陣人無分男女老幼，沿海岸共所有的生活用品佮破船的船枋閣船頂的柴料，落雨天那淋雨那沓沓仔搬徙到2、3公里外溪流會當入海的溪仔附近。到離山邊差不多有5公里遠攏是大粒粗石仔的所在，起一間大草厝集中物資佮予神父、船長蹛，另外四爿邊仔隨人起細間的草寮仔。

    除了船頂搬賰落來的米、肉，幾個少年家仔會武裝紮銃佮彎刀到海邊挖蚵仔、螺仔，有時去溪裡掠魚蝦；也有一个真大膽的葡萄牙人Balthasar Monteiro佮幾个少年囡仔，不時冒險紮火銃去山頂拍花鹿仔，予逐家有鹿仔肉通食。

    當地猶有原住民捌划幾若隻藤條做的竹排仔，載米、匏仔、金瓜、豉肉，猶閣有熊掌，欲來換物件，毋過因為語言袂通閣互相無信任發生武力衝突；原住民割1个「異教徒」的頭了後，就按呢毋捌閣看著人。

    進無步，退無路；逐家只好合力拍拚用大船散體的船枋、船頂的柴料佮索仔重造會當出海的大船。

 

 

 

14【南島語系平埔族掠花鹿仔】

 

    葡萄牙人Balthasar Monteiro冒險上山的時，捌看著當地原住民掠花鹿仔(學名-Cervus taiouanus)的情景－－

    佇開闊的草埔仔四界跳懸跳低的花鹿仔，隨時警戒鼻看有人佮狗的氣味無；遠遠覕咧風尾樹仔後、草埔仔內底的高強勇士，有手弓著利箭、有鏢鎗搦牢咧，雙耳鉸短(較袂去予草刺仔鑿著)的獵狗綴咧身軀邊，勻勻仔四箍輾轉圍倚－－到寒人的季節， 閣較有幾若社的族人集體做伙掠鹿仔。予射著的公鹿仔(逐年10-12月是花鹿仔交配期，隔轉年 6-8 月生產期，禁止掠母鹿仔)，毋是倒咧塗跤予獵狗咬著毋放；就是狂走入樹林仔，射入身軀的標槍頭，拖著縛索仔佮鈴仔的鏢鎗柄仔牢咧低樹仔的樹欉。為著無愛予著傷的花鹿仔繼續痛苦，聽鈴仔聲抑獵狗逐到位的獵人隨用鏢鎗對頷頸仔共揬死。

    南島語系的平埔族原住民拍獵，會感謝予刣死的動物提供𪜶身體需要的氣力，也感恩予𪜶拍獵順利的天地大自然，閣較敬拜族群先民的阿立祖佮「向魂」。

    鹿仔肉是平埔族原住民主要的營養補給，加出來的肉做肉乾，鹿仔油會使抹頭毛、抹身軀擋寒、保養匏仔壺，鹿仔血保養弓絃線佮藤箭身。鹿仔皮寒天做衫穿、做被佮床巾。鹿仔皮是經濟來源交易的「大色貨」，也是犯法的「罰款」。訂親的時，聘禮內底有用染紅的狗仔毛線結鹿仔角做的「手指」、鹿仔皮做的長襪仔。

    「花鹿仔」，是日常過日的需求，閣有經濟交易佮社會文化的功用－－是天賜予平埔族先民享用未盡的大恩禮，

 

 

 

15【起造禮拜堂徛十字架大船造好】

 

    為著安船難者落難的心，神父指導逐家起一間細間設有聖壇的禮拜堂，逐工講經宣道、做4擺missa、祈禱，也進行告解、領聖禮。閣規陣人提「聖女頭像」赤跤進行宗教儀式的遊行，佇附近的山崙頂徛一个大十字架。

    聽講較南爿海角有一个港口，船難者的漢人交涉欲共採買皮貨的漢人買船，結果講無成。啊本來想講欲予所有的船難者佮隨身的財產會當上船，煞船造了傷大食水傷深，干焦空船無載物件，等海漲才有法度對彎彎斡斡的溪仔出海。9月中煞拄著風透雨大，溪仔做大水予縛船的船索仔斷去，細隻的中國式帆船毋知沖去啥物所在。逐家當咧煩惱失志的時，聽講予漢人蹽水佇一个斡彎的溪墘揣著，而且船身也攏無啥損著，逐家感恩天主的聖靈愛護。

 

 

 

16【船難者冒險的航程平安回航】

 

    提心吊膽2個半月了後，總算佇月圓海漲9月30的彼工，靠細隻的中國式帆船分批接送，等到西班牙神父Pedro Gómez上尾一批，用載人為主超過290名船難者全部坐上逐家親手建造的新大船，離開這个有險惡海岸，有「野蠻人」予人驚惶不安的島嶼。佳哉規逝航程無拄著海賊；10月初4，又閣平安轉到澳門。

    這擺的船難當然變做澳門街頭巷尾口傳的大代誌，毋過毋是予人樂暢的好代－－商業投資者大大虧損，干焦賰200條金條轉來；教會只有紮著聖杯佮祭服，損失慘重。船頂船客所運載的財產，也佇船難的時無法度搶救，而且為著保命，坐轉來的船也無法度閣載個人加額的物件，致使有的船客全家大細陷入經濟困境。

 

 

 

17【Formosa美麗島暗淡的奇緣】

 

    葡萄牙人早佇16世紀初就占領印度Goa(果阿)，1511年東進占Maiaka(麻六甲)，1514年到古中國沿岸；因為「琉球王國」佮古中國進行「進貢貿易」佇東亞海上南來北往，佮西方的貿易商有生理往來，葡萄牙人佇1542年知影東亞北方有1个有真濟生理通做的日本。葡萄牙人佇澳門佮日本貿易船隻來來去去40年，經過予𪜶讚嘆稱做「Formosa」的沿岸，智覺有的所在予海賊占牢咧，也有「華商」抑「琉球商」做小額的交易佮一寡漁民討海停跤歇睏。在地住民有像東南亞猶閣是原始生活的原住民，無聽講有官方政體抑是生理人集團通做生理。

    毋捌想欲靠岸咧這个「Formosa」的島嶼，1582年想袂到拄著風颱牢船發生船難，佇遠看有翠青高山的美麗之島冒死上岸。經過佮在地原住民面對面接觸、武力對抗，佇島上驚驚惶惶75工了後，才暗淡轉到澳門。

    啊事後，西班牙Pedro Gómez神父仝款佮9名傳教士，那學日語那攢欲隔轉年欲去日本傳教，為天主奉獻服務。

 

 

 

18【Formosa平埔族看顧海岸的目睭】

 

    自從有大船船頂會拍火砲，遠遠攑銃就會彈出鐵珠仔予族人流血死亡；射箭、攑鏢鎗的南島先民就憤慨紅毛人是𪜶應該出草的「異族」。

    上起先沿岸發生船難的時，族人好奇也好心想欲救人，煞一倚身就著銃；後來便若牢船就起衝突相殺，船難者毋是予𪜶「出草」，無就提船頂的物件、剝身軀的衫仔褲(對大清帝國福建到臺灣，自古就有漢人「搶船」－沿海住民搶牢船佮船難者物件的風俗)當做「戰利品」。

    紅毛人拄牢船陸陸續續2、300人上岸的時，平埔族的先民先警戒觀察才那倚近，發現𪜶無火砲也無攑銃，閣無想欲對抗的款勢，就按呢去海砂埔抾海水沖來衫仔褲、絲綢布料。後來想用米、肉佮𪜶換物件，雖然少年的呂宋人會講一半句仔聽有的話，話語嘛是袂通，閣紅毛人後來提火銃防衛對抗，就按呢無拄好就起衝突互相攻擊，就無想閣往來交易。上尾看紅毛人沓沓仔造新船出海離開，也予逐工警戒的平埔族先民安心矣。

    平埔族是母系社會型態，女性佇村社有崇高的身分地位，像「阿立祖(母)」指定的代理人－古早稱「Inibs」的「尪姨」，是世界各地罕有的女性宗教「祭司」。

    自古以來，攏是男性領導人發動戰爭；若換「女性」領導人的母性思考，無定咱有無仝的歷史佮 閣較符合人民夢想的未來。

 

 

 

 

 

 

 

 

 

 

 

 

 

 

 

 

 

【後記】

 

     2021年11月，去「台灣e店」拄著吳成三先生，吳先生講著1582年葡萄牙商船拄著風颱佇台灣發生船難，是到今歷史文獻內底佇台灣島上早的船難事件，也是上代先寫著台灣南島語系平埔族的紀錄。吳先生一向關心咱有傳(thn̂g)著血統的平埔族歷史；吳先生捌請人共《康熙臺灣輿圖》內底平埔族的「社」重畫標示落來，配合我整理的自荷蘭時代進前到2008年「『賽德克族』正名，成做臺灣原住民族第14族」的<台灣南島語系原住民族事件年表>條目368幾條做文字說明(後來無完成)。吳先生這擺按算用繪本展現平埔族祖先生活環境的歷史現場，有請人寫華語版本伊無滿意，我講我來試寫台語版看覓。吳先生就按呢提供我《台灣與西班牙關係史料彙編I》內底西班牙籍Pedro Gómez神父描寫船難批信、西班牙籍Alonso Sánchez神父船難>的記錄、葡萄牙籍Francisco Pírez修士船難事件的備忘錄，閣周婉窈教授<一五八二年美麗島船難餘生記>佮〈陳第〈東番記〉──十七世紀初臺灣西南平原的實地調查報告〉予我做資料。

    後來佮吳先生討論了修改2遍，閣紲落，「台灣e店」店面的厝頭家欲起厝租吳先生被逼搬徙，佇2022年5月14佮「左轉有書－倒斡有冊」合作佇隔壁成立「讀派（Tho̍k-phài）書店」。看吳先生咧無閒，這个繪本文本的代誌就無閣提起。

    後來，我閣參考甘為霖《荷蘭時代的福爾摩莎》、陳宗仁《近世臺灣鹿皮貿易考：青年曹永和的學術啟航》，加強平埔族族人生活環境佮葬禮風俗。

    文稿修改校對完成，佇網路發現2023年7月陳慶坤先生佇中正紀念堂展出描寫「1582年葡萄牙Formosa船難事件」繪本《福爾摩沙陌生文明風情紀事》創作。

    陳慶坤先生繪本《福爾摩沙陌生文明風情紀事》的重點是台灣早期歷史的「西方文明」經驗；本文<1582年葡萄牙傀儡王船船難佮Formosa 平埔族>是強調台灣先民平埔族的生活歷史。

 

 

2021.12.16

2025.08.18 內湖北勢湖-伏居

 

 

 

 

 

 

【參考資料】

 

《臺灣早期歷史研究續集》：<台灣史研究的另一個途徑－－「台灣島史」概念>，曹永和，聯經

 

-<南島語族源起與臺灣原住民<演講稿，-劉益昌，2020.12.11

 

《台灣與西班牙關係史料彙編I》(李毓中主編/譯註，國史館臺灣文獻館，2008)

41件史料中西文對照譯文：

(013) 檔案：1582年12月13日倍德羅．戈梅茲(Pedro Gómez)神父自澳門寫給其他神父，有關他自中國前往日本途中遭遇船難的信件。

(014) 檔案：「阿隆索‧桑切茲(Alonso Sánchez)神父旅程的簡短報告」，描述其船隻1582年7月自澳門前往日本途中發生船難，以及在艾爾摩莎島上所發生的事。

(015) 檔案：安德列．費歐(André Feio)的戎克船在福爾摩沙島失事的報告，由葡萄牙籍的耶穌會法蘭西斯可．皮列斯(Francisco Pírez)敘述在他的備忘錄中。

 

《海洋與殖民地臺灣論集》：<一五八二年美麗島船難餘生記>(2011年7月修訂)、〈陳第<東番記>(2009年8月修訂)──十七世紀初臺灣西南平原的實地調查報告〉，周婉窈，聯經，2012

 

〈葡萄牙人與福爾摩沙―並論1582年的船難〉，翁佳音，《歷史月刊》，2006

 

〈由原住民史料再論一五八二年臺灣船難地點〉，邱馨慧，《台灣文獻》第60卷第3期，2009

 

《荷蘭時代的福爾摩莎》，甘為霖英譯/李雄揮漢譯/翁佳音校訂，前衛 ，2017

 

《近世臺灣鹿皮貿易考：青年曹永和的學術啟航》，曹永和著，陳宗仁註，

遠流，2011